ຈີນ ເອີ້ນການລົງໂທດຂອງ ສະຫະບັດ ຕໍ່ໜ່ວຍງານຕ່າງໆຂອງຕົນກ່ຽວກັບສົງຄາມ ຢູເຄຣນ ວ່າ “ຄິດໄປຝ່າຍດຽວແລະ ຜິດກົດໝາຍ” ແລະ “ບໍ່ອີງໃສ່ຄວາມຈິງ,” ໃນຄຳເຫັນຂອງວັນອັງຄານມື້ນີ້ກ່ອນໜ້າທີ່ປຶກສາດ້ານຄວາມໝັ້ນ ຄົງແຫ່ງຊາດຂອງທຳນຽບຂາວ ທ່ານ ເຈກ ຊູລລີວານ ຈະເດີນທາງໄປຮອດນະຄອນຫຼວງປັກກິ່ງ ສໍາລັບການເຈລະຈາລະດັບສູງເປັນເວລາຫຼາຍມື້.
ໃນອາທິດທີ່ຜ່ານມາ, ສະຫະລັດ ໄດ້ວາງມາດຕະການລົງໂທດຕໍ່ໜ່ວຍງານ ຕ່າງໆ ແລະ ບຸກຄົນທັງໝົດຫຼາຍກວ່າ 400 ກໍລະນີ ທີ່ໃຫ້ການສະໜັບສະໜູນການສູ້ລົບຂອງ ຣັດເຊຍ ຢູ່ໃນ ຢູເຄຣນ, ເຊິ່ງລວມມີບໍລິສັດຕ່າງໆຂອງຈີນ ທີ່ເຈົ້າໜ້າທີ່ ສະຫະລັດ ກ່າວວ່າ ໃຫ້ການຊ່ວຍເຫຼືອແກ່ ມົສກູ ເພື່ອຫຼີກລ່ຽງການລົງໂທດຕ່າງໆຈາກຝ່າຍຕາເວັນຕົກ ແລະເສີມສ້າງກອງກຳລັງທາງທະຫານ ຂອງພວກເຂົາ.
ວໍຊິງຕັນ ໄດ້ອອກມາເຕືອນ ປັກກິ່ງ ຊໍ້າແລ້ວຊໍ້າອີກກ່ຽວກັບການສະໜັບ ສະໜູນຖານອຸດສາຫະກຳດ້ານຄວາມໝັ້ນຄົງຂອງ ຣັດເຊຍ ແລະໄດ້ອອກມາດຕະການລົງໂທດຫຼາຍຮ້ອຍຄັ້ງເພື່ອແນເປົ້າໝາຍໃສ່ຈໍາກັດຄວາມອາດສາມາດຂອງ ມົສກູ ໃນການໃຊ້ປະໂຫຍດຈາກເທັກໂນໂລຈີບາງປະເພດ ເພື່ອຈຸດປະ ສົງທາງດ້ານການທະຫານ.
ທູດພິເສດຂອງຈີນສໍາລັບວຽກງານກ່ຽວກັບຢູໂຣບ, ທ່ານ ລີ ຮຸຍ (Li Hui), ຜູ້ທີ່ໄດ້ດຳເນີນວຽກງານດ້ານການທູດມາແລ້ວສີ່ຮອບ, ໄດ້ອອກມາຄັດຄ້ານການລົງໂທດຕ່າງໆໃນກອງປະຊຸມສຳມະນາ ສຳລັບນັກການທູດຢູ່ນະຄອນຫຼວງປັກກິ່ງ, ຫຼັງຈາກກອງປະຊຸມຄັ້ງຫຼ້າສຸດກັບບັນດາເຈົ້າໜ້າທີ່ຈາກປະເທດບຣາຊິລ, ອິນໂດເນເຊຍ ແລະ ອາຟຣິກາໃຕ້.
ທ່ານ ລີ ກ່າວວ່າ “ສະເພາະປະເທດໃດນຶ່ງໄດ້ນໍາໃຊ້ວິກິດການນີ້… ເພື່ອຫັນປ່ຽນການຕໍາໜິວິຈານໃນຄວາມພະຍາຍາມທີ່ຈະສ້າງໃນອັນທີ່ຮ້ອງວ່າ ທິດສະດີຄວາມຮັບຜິດຊອບຂອງຈີນ ແລະໄພຄຸກຄາມບັນດາປະເທດທີ່ມີການພົວພັນທາງເສດຖະກິດ ແລະ ການຄ້າປົກກະຕິກັບ ຣັດເຊຍ ດ້ວຍການລົງໂທດຝ່າຍດຽວ ແລະຜິດກົດໝາຍ.”
ທ່ານ ລີ ບໍ່ໄດ້ລະບຸຊື່ຂອງ ສະຫະລັດ, ແຕ່ກະຊວງການຄ້າຂອງຈີນກ່າວໃນວັນ ອາທິດແລ້ວນີ້ວ່າ ພວກເຂົາຄັດຄ້ານຢ່າງເຂັ້ມແຂງຕໍ່ການລົງໂທດຕ່າງໆ ແລະ ກະຊວງການຕ່າງປະເທດ ກໍໄດ້ສະແດງການຄັດຄ້ານຕໍ່ມາດຕະການຄວບຄຸມ ໃນຮອບກ່ອນໜ້ານັ້ນເຊັ່ນກັນ.