ກອງທັບອາກາດຢູເຄຣນ ກ່າວໃນວັນອັງຄານມື້ນີ້ວ່າ ຕົນໄດ້ທຳລາຍເຮືອບິນບໍ່ມີຄົນຂັບຫຼືໂດຣນ 29 ລໍາ ແລະລູກສອນໄຟນຳວິຖີທີ່ຣັດເຊຍໃຊ້ເພື່ອໂຈມຕີຫຼາຍ ຂົງເຂດຂອງຢູເຄຣນ ໃນຕອນຂ້າມຄືນ.
ກອງທັບຢູເຄຣນ ກ່າວວ່າ ສ່ວນໃຫຍ່ຂອງໂດຣນ ໄດ້ແນເປົ້າໝາຍໃສ່ຂົງເຂດ ມີໂກລາອິບ ທາງພາກໃຕ້ຢູເຄຣນ ແລະຂົງເຂດນິໂປຣປີຕຣອບ ຢູ່ທາງພາກກາງຂອງປະເທດ.
ທ່ານເຊີຮີ ລີສັກ ຜູ້ປົກຄອງເຂດນິໂປຣເປີຕບອບ ກ່າວວ່າສິ້ນສ່ວນຂອງໂດຣນທີ່ຕົກລົງມາ ໄດ້ທຳລາຍໂຮງງານອຸດສາຫະກຳ ໃນເມືອງປາບໂລຣາດ ແລະເຮັດໃຫ້ເກີດໄຟໄໝ້ ຢູ່ບໍລິສັດເອກກະຊົນ ໃນເມືອງດະນິໂປຣ.
ການໂຈມຕີ ໄດ້ມີຂຶ້ນຫຼັງການປະກາດຄືນໃໝ່ ໃນການສະໜັບສະໜູນ ຈາກ ສະຫະພາບຢູໂຣບ (EU) ໃນຂະນະທີ່ບັນດາລັດຖະມົນຕີ EU ພົບປະກັນຢູ່ ກິຢິບ ໃນວັນຈັນວານນີ້.
ການຊ່ວຍເຫລືອຂອງປະເທດຕາເວັນຕົກແກ່ຢູເຄຣນໄດ້ຢູ່ພາຍໃຕ້ຄວາມກົດດັນ ດ້ານການເມືອງ ຫລັງຈາກຜູ້ສະໝັກໜັບສະໜູນຣັດເຊຍ ໄດ້ຮັບໄຊຊະນະໃນການເລືອກຕັ້ງຢູ່ສະໂລວາເກຍ ທີ່ເປັນສະມາຊິກ EU ແລະອົງການ NATO ແລະສະພາສະຫະລັດ ໄດ້ຍົກເວັ້ນທຶນໃຫ້ແກ່ຢູເຄຣນ ຈາກຮ່າງກົດໝາຍໃຊ້ຈ່າຍຊົ່ວຄາວ. ການບຸກໂຈມຕີຕອບໂຕ້ຄືນຂອງກອງທັບຢູເຄຣນ ໄດ້ຊ້າກວ່າທີ່ບັນດາຜູ້ນຳຕາເວັນຕົກໄດ້ຄາດຫວັງໄວ້ ກ່ອນລະດູໃບໄມ້ຫລົ່ນ ທີ່ມີຂີິ້ຕົມຕິດຄ້າງຢູ່ຕີນຂີ້ເຂັບລົດຫຸ້ມເກາະທີ່ເຂົາເຈົ້າໄດ້ບໍລິຈາກໃຫ້.
“ໄຊຊະນະພວກເຮົາແມ່ນຈະແຈ້ງຂຶ້ນຢູ່ກັບການປະສານງານຮ່ວມມືຂອງພວກເຮົາ ບາດກ້າວທີ່ມີກຳລັງ ແລະຫລັກການ ທີ່ພວກເຮົາເຮັດດ້ວຍກັນ ໃນບໍ່ຊ້າສົງຄາມນີ້ກໍຈະສິ້ນສຸດລົງ” ປະທານາທິບໍດີຢູເຄຣນ ທ່ານໂວໂລດີເມຍ ເຊິເລັນສ໌ກີ ໄດ້ກ່າວຕໍ່ບັນດາລັດຖະມົນຕີຕ່າງປະເທດຂອງ EU ລະຫວ່າງກອງປະຊຸມ.
ທ່ານເຊີເລັນສ໌ກີ ໄດ້ໃຫ້ຂໍ້ສັງເກດວ່າຢູເຄຣນ ສືບຕໍ່ປ້ອງກັນປະຊາຊົນຂອງຕົນ ແລະເສດຖະກິດຂອງຕົນ ຈາກການສືບຕໍ່ໂຈມຕີຂອງຣັດເຊຍ ແລະການຕໍ່ສູ້ປ້ອງກັນ ໄດ້ແນໃສ່ການກອບກູ້ເອົາດິນແດນ ທີ່ຖືກປົກຄອງຢູ່ນັ້ນ ກຳລັງຄືບໜ້າຢ່າສະໜໍ່າສະເໝີ ແລະເຕືອນຜູ້ນຳ EU ວ່າຢູເຄຣນ ຕ້ອງການເງິນຕື່ມອີກ ອາວຸດຕື່ມອີກ ແລະເພີ້ມການເຝິກແອບທາງທະຫານ ເພື່ອໃຫ້ບັນລຸເປົ້າໝາຍ. ທ່ານຍັງຂໍຮ້ອງໃຫ້ເຂົາເຈົ້າທຳການລົງໂທດຕໍ່ຣັດເຊຍເພີ້ມຂຶ້ນ.